唔想裝修貼錢買難受就一定要睇完呢個系列嘅文,每篇都梗有幾點hit中你。無論你想搵裝修公司、自己DIY搞interior design,又或者想了解裝修工程點驗收,例如點驗防水或空心磚呢D,呢篇文都會幫到你。好多人起網上搵資料睇,OK嘅,但要留意地區分別,中港台澳既常用裝修物料都好唔同;如果你用英文搜尋 house design / home design 呢D字,就更會發現內容完全唔適用於香港。媒體文章方面,筆者有好多文章登起蘋果動新聞、晴報、HK01,或者iMoney等等,但係往往分得好散,咁不如我寫幾篇大雜燴懶人包俾大家廣傳仲好。我大約會寫5篇,每篇結尾我會賣少少廣告咁樣。

首先講下裝修物料:

裝修物料Part1(第1至6點):油漆篇

2021裝修及室內設計貼士100點合集(第 1 - 19 點) 附文:裝修佬教你搵裝修公司

1.油漆唔好用油性,呢樣野一定要同師傅講,尤其手掃漆磁漆,你唔講明,有 8成師傅都會用油性。

2.而家市面上所有油漆都有水性,仲有好多顏色,光面啞面任你揀,所以如果師傅話「水性油漆光面好肉酸」,你就知道佢既認知唔update囉!師傅覺得油性油漆耐用D實淨D,其實無錯,但就係舊觀念黎。呢幾年油漆水性配方改進左好多。

3.點解唔好用油性油漆,因為佢用天拿水開,無甲醛,但有好多VOC,好毒。好多人平日開冷氣關窗生活,咁就食哂D VOC,你叫師傅做嘢時唔開窗佢都唔制啦。

4.提多一點,除甲醛同除VOC係兩回事,市面上除甲醛產品未必除到VOC,而有D會冒認除到,所以為免中招,最好唔好主動用D高VOC既產品啦!

5.有人問,油漆油牆係咪一定係用立邦多樂士呢?拿,乳膠漆係佢地真係主流亦唔錯既選擇,但油漆無論幾靚都只係油漆,一樣會有墙裂既風險,唔想有墙裂既可能,就要考慮貴價D、非乳膠漆既塗料選擇。

6.我唔係講黑板漆白板漆呢D,呢D我覺得比唔上淘寶既黑白板貼,但藝術顏料就係一種貴D靚D唔易霉唔易有墙裂問題既選項,咁當然多樂士同立邦亦都各自有自己系列既藝術顏料。

2021裝修及室內設計貼士100點合集(第 1 - 19 點) 附文:裝修佬教你搵裝修公司

裝修物料Part2(第7至8點):磁磚篇

7. 磁磚 ( 瓷磚)要注意既嘢有好多,想聽哂真係要黎上堂,但空心磚問題係最多人關心,可以講下。

空心磚既成因有三點:

  • 因為防水料造得太厚;
  • 磁磚條罅留得太窄;
  • 最常見既原因─就係磁磚(瓷磚)無浸水。

8. 地磚例如木紋磚密度高唔駛浸,但牆磚就要多數要浸。點知要唔要瓷磚浸水,你浸落水睇下有冇泡出,有就即係要。飲唔飽水就鋪就會出現空心磚。你將牆身磚同木紋地磚放入水就會見到分別,真係唔肯定就問下賣磚舖啦!

2021裝修及室內設計貼士100點合集(第 1 - 19 點) 附文:裝修佬教你搵裝修公司

裝修物料Part3(第9至12點):地板篇

9. 地板既選擇好多人搞唔掂,因為無統一用字。首先要講下無縫地板。我寫文從來唔講無縫地板,因為無縫地板唔係一種物料黎,只係代表佢係用扣榫方式安裝。膠地板無縫地板同木地板無縫地板性質根本唔同,木地板又分為木纖維地板(laminate)同實木複合地板(engineered wood),兩者無論起安裝定係特性上係完全唔同,所以睇文章講無縫地板,好容易會越黎越亂。

纖維木地板VS實木複合地板

香港外國意思
木纖維地板Laminate Flooring面層是木紋印刷色紙,內層是由木碎(MDF高密度纖維板)壓成
實木複合地板Engineered Wood面層是實木,下面是由不同層數的夾板夾成

10. 除左無縫地板,複合地板都係好麻煩既terms,大陸既複合地板同香港既複合地板係兩樣物料黎。

11. 如果唔想用磚鋪地,你應該比較膠地板、石塑地板(英文名叫SPC地板)同埋纖維地板呢三種。如果講最值得大家留意既,一定係SPC 地板,因為佢完全防水,唔怕受潮。新加坡同香港氣候相近,多數人都係用SPC地板,好少用纖維地板。呢個完全係因為市場有冇人推廣,令大家識唔識呢隻物料所致。
12. 實木地板基本上又貴又唔耐用,已經算係俾市場淘汰左。唔講佢。

常見地板分類圖

2021裝修及室內設計貼士100點合集(第 1 - 19 點) 附文:裝修佬教你搵裝修公司
2021裝修及室內設計貼士100點合集(第 1 - 19 點) 附文:裝修佬教你搵裝修公司

裝修物料Part4(第13至19點):傢俬篇

13. 到傢俬物料啦。好多人問點揀,又問用夾板好定纖維板好。其實門板要輕、否則五金負荷重,背板要高密度、否則五金唔爛但背板爛,個櫃都係會塌。咁你話應該用夾板定纖維板?呢D細節一般係傢俬廠同埋裝修公司按櫃既結構需要去調整。如果裝修公司問番你用咩料,你應該叫佢俾意見先,唔係一陣工程開始左佢咩都問番你轉頭,你就好大壓力架啦。

14. 好師傅係應該識得俾建議客人,而唔係下下問番客,否則呢個口盔就未免戴得太穩啦。

15. 傢俬真係要客揀既,反而係面料,即係焗漆、膠板、木板三種。最值得大家了解既就係膠板,又叫防火板,市面上有西德板防火板、formica防火板、德利板防火板呢D。防火板容易清潔、抗壓抗刮都強,所以造地台都係用防火膠板多。

16. 防火板唯一唔好處,係防火板邊既碰口位有黑邊,要戶主要識得主動同公司講要用封邊條封邊,否則裝修公司一定唔會封,因為係逐尺計架。另外,地台床邊係封唔到,因為防火板既封邊條有闊度限制。西德板最闊都係兩三尺左右。如果要做到見唔到黑邊,設計時就要非常講究。

17. 講到傢俬,好多人都以為一定要訂造。太懶啦!拿,你做書枱、做鞋櫃,呢D可能係需要訂造,但地台床?Come on,床既尺寸係標準架,有乜好訂造呀?用現成或者用積木地台床,壽命長一倍,成本低一半,大省300%!

18.另外間中有人問我翡翠傢俬D木得唔得,話係實木,又話好平黎。拿我淨係講三點。

  • 第一、松木係好平既實木,密度亦低,你試下同翡翠傢俬講想換另一隻木,咁就會貴好多;
  • 另外你留意下,翡翠傢俬好多傢俬都係無飾面。咁你話佢既耐用性同埋選擇性係咪好有限制呢?
  • 第三,我必須講句,我唔係話翡翠傢俬唔好,而係適唔適合你個人同埋你造咩櫃。

19. 做書枱要承重、做鞋櫃唔駛;做廚櫃廁櫃要受潮,做地台床如果鋪上塌塌米根本咩都見唔到,咁真係可以飾面都唔造。呢D都係考慮。

文章提供:裝修佬

想了解更多裝修知識,請留意裝修佬專欄

裝修佬致力於令香港沒有麻煩/爛尾的裝修,並提供裝修報價裝修防伏課程,為傳統裝修及家居領域帶來新的變革。

延伸閱讀: 【裝修佬專欄】

香港喉管監管不足、易引致病毒傳播?

裝修爛尾個案直擊:苦主慘失80萬 O字頭設計公司工程放蛇揭發後再開業

收納空間規劃:5 個收納設計DIY 提升家居潔淨設計感

座廁內藏致命清潔黑點!3款馬桶內壁設計大比拼

換季攻略:冬季衣服清潔法 + 4 個必知衣物標籤